ILOILO CITY- Wala ginakahuya sang isa ka 31-anyos nga young entrepreneur sa banwa sang Oton nga sa iya edad nga 31, amo pa lang siya makatapos sa Senior High School.
Sa interview sang Bombo Radyo kay Anthony Mark Camagan, tumandok sang Barangay Rizal, Oton, Iloilo, iya ginpahayag nga madamo sang mga sirkumstansiya nga nag-abot sa iya kabuhi nga kinahanglan niya isakripisyo ang iya pag-eskwela bangud sa kapigaduhon.
Suno kay Camagan, antes ini nagdesisyon nga magpadayon sa pag-eskwela, kutob lang sa second year high school ang iya nalab-ot kun sa diin nag-untat ini agud nga magtrabaho sa sulod sang pito ka tuig sa Metro Manila.
Samtang nagatrabaho sa Manila, gin-gamit man ini niya nga kahigayunan agud mag-enrol sa Alternative Learning System.
Sang nagpauli ini sa Iloilo, didto na nadesisyunan ni Camagan nga mag-enrol sa Oton National High School kun sa diin sa night class ini nagasulod bangud nga sa adlaw may yara ini sang trabaho kag mga sidelines.
Samtang nagaeskwela, ginasuportahan man niya ang isa niya ka utod nga nagaeskwela man sa kolehiyo.
Ginsekreto naman niya sa iya pamilya nga nagaeskwela ini sa Senior High School bangud luyag niya nga sorpresahon sila.
Sa Mayo 30, patigayunon ang graduation ceremony ni Camagan kag tuman ini ka malipayon nga napadayon niya ang handom nga makaeskwela.
Gin-ako naman niya nga indi niya anay pagpadayunon ang iya pag-eskwela sa kolehiyo kag paunahon anay niya ang iya utod nga nagakinahanglan sang iya suporta agud makatapos ini sa pagtuon sa kolehiyo.
