Madul-ong lang kuntani sang pizza ang isa ka 32-anyos nga lalaki sa Dingle, Iloilo apang gin-diretso ini sa presuhan matapos nadakpan nga nangbastos paagi sa ginapahayag pag-masturbate sa pampubliko nga lugar.
Residente sang banwa sang Anilao ang lalaki, may asawa, kag naga-trabaho bilang isa ka pizza delivery boy sa syudad sang Iloilo.
Sa interview sang Bombo Radyo kay Police Major Jonah Galicha, hepe sang Dingle Municipal Police Station, iya ginpahayag nga ang ginbastos sang lalaki amo ang 23 -anyos nga dalaga nga nagahimos sa sulod sang isa ka tindahan malapit sa plaza.
Suno kay Galicha, samtang yara sa sulod sang store, namutikan sang babayi nga may landong malapit sa iya kag sang ginbuksan sini ang puwertahan, dakop gid sa akto ang suspek nga ginapahayag nagahampang sa iya kinatawo.
Gilayon nga nagdalagan ang lalaki apang ginlagas sang babayi kag sang naabtan, nangayo sang bulig ang biktima sa mga pulis kag gilayon man nga na-respondehan.
Paathag sang pulis, disente ang panapton sang biktima kag posible nga natahuman ang suspek sa iya rason nga nahimo sini ang amo nga akto.
Gin-file ang complaint sa Municipal Trial Court bangud sa ginapahayag paglapas sang lalaki sa Republic Act 11313 ukon Safe Spaces Act.
Ang Section 4 sang Article 1 sa RA 11313 ang naga-saad nga makabig nga krimen nga gender-based streets and public spaces sexual harassment ang “unwanted and uninvited sexual actions” batok sa isa ka tawo. ##
