ILOILO CITY – Gin-ako ni Police Regional Office 6 (PRO-6) director C/Supt. Cesar Hawthorne Binag nga isa sa mga rason sang paghimakas nila nga madakpan ang top drug lord sang Western Visayas nga si Richard Prevendido, ang pressure sa media lakip na ang Bombo Radyo.
Nahibaluan nga may countdown ang Bombo Radyo kun pila na ka bulan halin sang nag-lapse ang kaugalingon nga deadline sang kapulisan para madakpan ang drug lord.
Suno kay Binag, pressured sila sa hanay sang kapulisan sa masami nga pagpanukot sang media.
Sa pagkamatuod suno sa PRO-6 director, antes siya magtulog si Prevendido ang iya ginapaminsar kag pagbugtaw si Prevendido gihapon.
Ginbutang mismo ni Binag sa hulot sini ang laragway ni Prevendido agud magserbe nga pahanumdom sa iya tagsa pagbugtaw nga dapat dakpon na ang drug lord.
Suno pa kay Binag, masami niya sadto pamangkot sa kaugalingon kun san-o madakpan si Prevendido.
Sang Setyembre 1 sang na-neutralize si Prevendido matapos matultulan ang ginapanaguan sini nga balay sa Balabago, Jaro, Iloilo City kun sa diin napatay ang drug lord kag ang iya anak.