Ginpatigayon sa syudad sang Iloilo ang 32nd Philippine Travel Agencies Association (PTAA) Travel and Tour Exposition — ang ginakabig nga pinakadaku nga travel exposition sa bug-os nga pungsod.
Ginahiwat ini sa Iloilo Convention Center humalin sang Hunyo 6 tubtob buwas, Hunyo 8.
Sa interview sang Bombo Radyo kay PTAA Board of Trustee Charlene Del Rosario, iya ginpahayag nga ang 3-day expo ang gina-updan sang mga nagkalain-lain nga travel agencies gikan sa Visayas kag Mindanao magluwas pa sa airlines, resorts, kag hotels.
Magluwas sa mga sponsors kag exhibitors, gintambungan man ini sang mga estudyante sa nagkalain-lain nga eskwelahan kag ginaupdan man sang Iloilo MICE Alliance kag ginsuportahan sang Department of Tourism Region VI, Iloilo City Government, kag Iloilo Provincial Government.
Napili ang Iloilo City nga venue bangud nga isa ini ka rising destination, accessible, kag naga-cater man sang international flights.
Kilala man ang Iloilo nga yara sa travel map matapos nahingadlan sang United Nations Educational, Scientific, and Cultural Organization (UNESCO) bilang City of Gastronomy.
