Ginbawian sang kabuhi ang 33-anyos nga si Garry Legario matapos ang pagbinun-anay kag paglabu-ay nila sang 25-anyos nga si Frederick Lauron sa Barangay Maribong, Lambunao, Iloilo, sang gab-i sang Oktubre 13, 2026.
Sa interview sang Bombo Radyo kay PLt. Vincent Garcia Jr., hepe sang Lambunao Municipal Police Station, iya ginpahayag nga nagainom sang makahulubog nga ilimnon si Lauron sa balay ni Legario sang hinali nga nagluntad ang mainit nga pagbinaisay sa tunga nila.
Ginlabo sang suspek ang biktima gamit ang binangon kag naigo sa wala nga abaga sini.
Dugang pa ni Garcia, pagkatapos sang insidente, nagpalagyo ang suspek, apang nakatinguha si Legario nga makabalos paagi sa pagbuno kay Lauron, nga naigo sa dughan.
Nagpalagyo naman si Lauron apang nagbalik nga armado sang kutsilyo kag ginbuno si Legario sing makaisa sa dughan.
Gilayon nga gindala sang ila tagsa ka pamilya ang duha sa Calinog District Hospital para sa pagbulong, apang ginbawian sang kabuhi si Legario.
Padayon nga ginaiimbestigaran sang Lambunao Municipal Police Station ang insidente.
Text by: Bombo Jay Panizales
