ILOILO CITY – Naglab-ot na sa 307 ang kabug-usan nga numero sang Coronavirus Disease 2019 (COVID-19) sa Western Visayas matapos nga 33 ang nagdugang subong nga adlaw, Hunyo 29.
Sa interview sang Bombo Radyo kay Dr. Renilyn Reyes, COVID-19 spokesperson sang Department of Health Region 6, sa 673 ka laboratory results nga ginpaguwa, 633 diri ang negatibo kag 40 ang nagpositibo kun sa diin lima diri ang ginpaidalom sa repeat test kag duha ang makabig nga Transient Locally Stranded Individual rason nga 33 lang ang counted para sa Rehiyon 6.
Suno kay Reyes, sa 33 ka ka mga pasyente nga nagdugang, isa diri ang admitted sa hospital samtang ang 32 naman ang naka facility quarantine.
Ginpahayag ni Reyes nga nadugangan naman sang isa ang 125 nga numero sang mga naka recover kag nagapabilin naman sa 11 ang patay.
Ang pasyente nga nag-ayo amo si Patient no. 130 – 61 anyos nga lalaki sang Arevalo, Iloilo City nga isa ka repatriated Overseas Filipino Worker.
Kun pahat-pahaton, ang Aklan ang may anum ka COVID-19 cases, Antique nga may 14, Capiz nga may 6, Iloilo Province nga may 38, Negros Occidental nga may 3, Bacolod City nga may 11, Iloilo City nga may 28 kag 201 sa repatriates.
