33,000 ka mga manunudlo kinahanglan sang DepEd

Nagakinahanglan sang kabug-usan nga 33,000 ka mga bag-o nga manunudlo ang Department of Education (DepEd) para sa School Year 2019-2020.

Suno kay DepEd Undersecretary Anne Sevilla, kabug-usan nga 10,000 ka mga bag-o nga teaching posts ang ila nga himuon kag ang 23,000 teaching vacancies ang kinahanglan nila nga pun-on.

Dugang pa ni Sevilla, ang 23,000 accumulated vacant positions ang nahimo na sadto apang wala gilayon nga napuno.

Gin-athag naman ni DepEd Secretary Leonor Briones nga wala sila nag-untat sa pagkuha sang mga manunudlo bangud man sa nagadako ang populasyon sang mga estudyante kada tuig.

Luyag kuntani sang DepEd nga mapagamay ang numero sang mga estudyante sa isa ka klase.

Ginalauman nga magdangat sa 27.8 milyon ka mga estudyante ang magabalik-eskwela subong nga School Year 2019-2020.

Nahibaluan nga magabukas ang klase sa Hunyo 3.