ILOILO CITY – 35 ka mga barangay sa syudad sang Iloilo ang nalakip sa high risk barangays may kaangtanan sa epekto sang Bagyo Tisoy.
Sa interview sang Bombo Radyo kay Donna Magno, pinuno sang City Disaster Risk Reduction and Management Office, iya ginpahayag nga ang 35 ka mga barangay ang masami nga ginabaha sa tion nga magbubo ang mabaskog nga ulan.
Suno kay Magno, nalakip sa top 10 flood prone barangay amo ang Calubihan, Balabago, Lanit, Quintin Salas kag San Isidro sa distrito sang Jaro, Sooc sa distrito sang Arevalo, Navais, Dungon C kag Calajunan sa distrito sang Mandurriao kag San Isidro sa distrito sang La Paz.
Ginpahayag ni Magno nga kalabanan sa mga ginapaaligmat amo ang mga naga-istar sa coastal barangay kag low-lying areas.
Sa subong, 24/7 nga operational ang Emergency Operation Center sa diin may nagabantay nga mga personnel gikan sa nagkalain-lain nga ahensya sang gobyerno.
Subong nga adlaw, may rekorida nga patigayunon agud mapaalinton ang pumuluyo nga mag-aligmat sa posible epekto sang bagyo.
