Nag-abot na sa probinsya sang Cebu ang 35,000 ka bag sang well-milled rice halin sa National Food Authority (NFA) bilang kabahin sang pilot testing sang P20 kada kilo nga bugas nga programa sang gobyerno.
Suno sa Department of Agriculture (DA) nag-umpisa na sang Lunes ang pag-unload sang shipment sang NFA rice nga halin sa bodega sang ahensya sa Mindoro.
Ang nasambit nga 35,000 ka bag sang NFA rice isa lamang ka kabahin sang kabug-osan nga 600,000 ka bag nga gin-order ni Cebu Governor Gwendolyn Garcia para sa programa sa probinsya nga magahatag sang NFA rice sa presyo nga P20 kada kilo.
Nagpasakop man sa subsidized rice initiative ang mga probinsya sang Bohol, Siquijor, kag Southern Leyte.
Ang apat ka probinsya may kabug-osan nga inisyal nga order nga 673,000 ka bag sang 50-kilo nga bugas para sa pilot test nga magalawig tubtob Disyembre.
