SAN DIONISIO, ILOILO – Kumbinsido ang mga himata sang naghikog nga 36-anyos nga lalaki sa San Dionisio, Iloilo nga wala sang foul play sa likod sang insidente.
Sa interview sang Bombo Radyo kay Police Captain Rene Del Castillo, hepe sang San Dionisio Municipal Police Station, iya ginpahayag nga ulihi nga nakit-an ang biktima nga indi mahim-os kahapon nga adlaw, Disyembre 13.
Kaina sang aga, nasapwan ang biktima nga nagabitay sa puno sang indian mango sa kilid sang ila nga balay.
Suno kay Del Castillo, antes nagpanginmatay, may ginsulat pa sa pader ang biktima kun sa diin nagapasalamat siya kag nagapaalam sa iya nga iloy.
Suno pa sa hepe, lima na ka bulan ang nakaligad sang ginbayaan sang iya asawa ang biktima kag gindala pa ang ila isahanon nga anak.
Wala man sang trabaho ang amo nga biktima gani posible suno sa hepe nga nahulog ang iya ginabatyag sa depression.
