ILOILO CITY – 36 ka Locally Stranded Individuals kag 3 ka Overseas Filipino Workers ang nagpauli sa syudad sang Iloilo, kaina sang hapon, Hunyo 8.
Sa interview sang Bombo Radyo kay Public Safety and Trabsportation Management Office Head Jeck Conlu, iya ginpahayag nga ang 39 nga nagpauli ang naghalin sa Metro Manila sakay sa barko kag lunsay mga tumandok sang syudad sang Iloilo.
Suno kay Conlu, mismo ang Iloilo City Government ang nagpanikasog agud matigayon ang repatriation apang mas mauti lang ang pagpapauli sa mga Locally Stranded Individual.
Ginpahayag ni Conlu nga pag-abot sa syudad sang Iloilo, ang 39 ang ginpaderetso sa Diamond Jubilee Hall para sa COVID-19 testing kag ang mga nagnegatibo ang pahanugutan na nga makapauli para sa home quarantine.
Ang mga magpositibo naman sa Rapid test ang magapabilin sa nasambit nga quarantine facility.
Magluwas diri, may natalana pa nga maga-abot sa syudad sang Iloilo sakay sa eroplano apang wala pa sang final schedule sang flight.
