POTOTAN, ILOILO – Ginsulod sa kwarto kag ginlampusan sang maso ang 61 anyos nga amay sa Barasan, Pototan, Iloilo.
Ang suspek amo ang iya man lang anak nga si Ericson, 37 anyos, naga-istar sa Taft North, Mandurriao, Iloilo City.
Sa interview sang Bombo Radyo kay PSSg. Raffy Gonzales, imbestigador sang Pototan Municipal Police Station, iya ginpahayag nga nagbisita si Ericson kaupod ang iya 10 ka tuig nga anak nga lalaki sa iya amay nga si Giovani sa banwa sang Pototan.
Tinutuyo kuntani ni Ericson nga ihatag ang motor nga para sa iya nga amay.
Ang amay ang naga isahanon lamang sa balay sa diin ang asawa sini ang yara sa Metro Manila kag ang iban nga kabataan ang may mga tagsa na ka pamilya.
Bangud man sa kahidlaw sang amay, ginbaklan niya sang tatlo ka beer ang iya anak.
Apang sa wala mahibaluan nga rason, samtang yara sa sulod sang kwarto ang amay kaupod ang 10 ka tuig nga bata, nagsulod si Ericson kag ginlampusan sang maso ang ulo sang iya amay nga si Giovani.
Sa panaysayon sang mga kasilingan, nabatian pa nga nakasinggit sang tabang ang amay.
Pag-abot sang mga kapulisan, naabtan nila nga ginaguyod ni Ericson ang iya amay nga duguon kag wala na sang kabuhi.
Sa pagpangusisa sang pulis kay Ericson, iya ginpahayag nga duha ka adlaw nga wala siya sang tinulugan kag may yara sang malain nga espirito nga nagsulod sa iya sa diin wala na niya napunggan ang kaugalingon rason nga napatay niya ang amay.
Si Ericson ang isa ka seaman apang isa na ka tuig nga wala ini makabalik sa barko kag ang iya amay ang isa man ka retired seaman.
Base naman sa live-in partner sang suspek, wala naangot sa iligal nga droga si Ericson sa diin wala ini nagahalin sa ila nga balay.
Nagpanugyan ang pulis nga kun mahimo ipa-rehab ang suspek kag ipadangop man sa eksperto ang 10 ka tuig nga bata nga nakakita sang krimen.
