Nagkalaubos patay ang 37 tanan ka mga baboy sang isa ka hog raiser sa probinsya sang Guimaras.
Ini ginalakipan sang 27 ka mga idik, 5 ka mga yubo kag 5 lima man ka mga nayon.
Sa interview sang Bombo Radyo kay Trisha Tamayo, iya ginpahayag nga naka-eksperiensya sang pagsuka-suka ang mga baboy, nagatulog lamang ang mga ini kag nagapalangluya.
Pahayag pa sini nga sa kadugayon nga nagasagod ang ila nga pamilya sang baboy, amo sini ang una nga tion nga naka-eksperiensya sila sang pagkalamatay sang ila nga mga baboy.
Nagresulta man ini sang dako nga kapierdehan sa ila pangabuhian.
Suno pa kay Tamayo nga sang nagpakig-angot sila sa Municipal Agriculture Office sang Nueva Valencia gilayon man nga ginturukan ang mga baboy batok sa posible nga hog cholera apang wala gid mapunggan ang pagkalamatay sang mga ini.
Sa pihak nga bahin, may impormasyon man nga may 18 man tanan ka mga nayon sa malapit nga lugar sa ila ang nagkalamatay man.
Nagapanawagan naman si Tamayo sa mga natungdan nga ahensya sang gobyerno nga kuntani maaktuhan gilayon ang natabo nga pagkalamatay sang mga baboy.
Dugang pa sini nga kabay mapadasig ang imbestigasyon sa amo nga hitabo kag mahatagan ang mga ini sang bulig bangud wala gid sila nakapangaman.
