ILOILO – Ginpagwa na sang Department of the Interior and Local Government (DILG) ang Official List of Passers sa 2019 Good Financial Housekeeping.
Sa 42 ka kabanwahan sa probinsya sang Iloilo, 38 ang nadala magluwas lang sa banwa sang Barotac Nuevo, Barotac Viejo, Carles, kag New Lucena.
Sa interview sang Bombo Radyo kay Mayor Raul Bañas sang Concepcion, Iloilo nga isa man sa mga nadala sa amo nga listahan, iya ginpahayag nga gin-assess sang DILG ang compliance sang kada banwa sa pagdumala sang ila mga finances.
Suno kay Bañas, ginlantaw sang pamunuan kun bala nadumala sang mga local government units ang ila financial affairs santo sa parametro sang DILG.
Nahibaluan nga kun wala nalab-ot ang parametro, indi makakuha sang Seal of Good Financial Housekeeping ang isa ka munisipalidad nga amo man ang isa sa mga importante nga requirement para makakuha sang Seal of Good Local Governance.
Pahayag pa ni Bañas, ang Seal of Good Financial Housekeeping ang isa man ka pamatuod nga na-liquidate ang tanan nga pondo nga gingamit sang banwa.
Sa bahin sang Concepcion, suno kay Bañas, ang Seal of Good Financial Housekeeping ang bunga sang pagpaninguha sang iya pagpamuno kag sang alkalde antes sa iya bangud sang Hulyo na siya sa nagpungko sa pwesto.
