𝗜𝗟𝗢𝗜𝗟𝗢 —Nagdugang sang 398 ka mga bag-o nga kaso sang dengue ang na-record sang Iloilo Provincial Health Office (PHO) subong lang gid nga semana.
Sa interview sang Bombo Radyo kay Dr. Maria Socorro Quiñon, Head sang Iloilo Provincial Health Office, iya ginpahayag nga ang 1,263 cases nga na-record sa 33rd morbidity week, ang distributed sa pila ka mga morbidity weeks.
Suno kay Quiñon, ang 604 cases ang nagkadto sa morbidity week 32; ang 165 cases, ang yara sa morbidity week 31; samtang ang mga late cases ang na-record sa morbidity week 30.
Ginpahayag man sini nga ang bag-o lang nagsulod nga 37 ka mga kaso sang dengue ang na-record sa morbidity week 30, samtang 16 cases naman para sa morbidity week 29; may 20 cases naman sa morbidity week 28, kag 10 cases ang yara sa morbidity week 27.
Samtang, ang nabilin nga 13 ka mga kaso ang na-record pagid sa mga previous nga morbidity weeks.
Nagpasalig naman ang natungdan nga nakaprepar na ang talatapan sang ila nga Annual Procurement Plan (APP) para sa mga procurement activities.
Lakip na diri ang gamiton nga pondo agud ibakal sang medical supplies kag ipanagtag sa 13 ka mga district hospitals sa probinsya.
Nahibaluan nga nagpaguwa na sang memorandum ang probinsya sang Iloilo paagi sa Department of Interior and Local Government (DILG) nga nagamandu sa tanan nga alkalde kag punong barangay sang probinsya nga pasangkaron ang mga aktibidad batok sa lamok, agud nga ma-mitigate kag ma-prevent ang pagsaka sang kaso sang amo nga balatian.
