Ginaseksyar sang 3rd Infantry Division Philippine Army ang posibilidad kon may mga kandidato nga konektado sa mga rebelde.
Sa interview sang Bombo Radyo kay Colonel Erwin Rommel Lamzon, assistant division commander sang 3rd Infantry Division Philippine Army, iya ginpahayag nga nagapatuman na sang posturing ang talatapan para sa palaabuton nga national and local elections sa Mayo 12, 2025.
Suno kay Lamzon, ginmanduan na ang tanan nga troops nga yara sa idalom sang 3rd Infantry Division nga i-handa ang ila kaugalingon kon kinahanglan sang pwersa sang Commission on Elections (COMELEC).
Ginpahayag man sini nga mahimo ibutang sa duha ka tracks ang tikang nga ipatuman kon sa diin, ang isa amo ang paglantaw sa insurgency kon may relasyon pa ang politiko sa mga rebelde.
Lakip man diri ang intense political rivalry kon sa diin, mas pasangkaron ang public safety and security nga i-handle naman sang Philippine National Police (PNP).
Gintuad man ni Lamzon nga wala nila ginadula ang posibilidad sang pagpatuman sang tax implementing group sa kabukiran ukon mas kilala sa tawag nga ‘permit to win’ kag ‘permit to conduct a campaign’ nga ginatanyag sang mga rebelde sa mga kandidato.
Gina-monitor naman sang talatapan ang amo nga aktibidad bangud may posibilidad nga magtuhaw ini subong nga nagahilapit sang eleksyon.
