Nagpasalig ang 3rd Infantry Division sang Philippine Army nga mangin alerto sa gihapon sa Western Visayas apisar nga wala sang lugar sa rehiyon ang yara sa red election hotspot sa 2025 midterm elections.
Sa interview sang Bombo Radyo kay Colonel Erwin Rommel Lamzon, assistant division commander sang 3rd Infantry Division Philippine Army, iya ginpahayag nga apisar nga wala sang red hotspots, may yara sa gihapon sang mga orange hotspots ang rehiyon nga dapat tutokan sa palaabuton nga eleksyon.
Suno kay Lamzon, indi man kinahanglan mangin kampante apisar nga napapas na ang kalabanan sang mga katapo sang Communist Party of the Philippines (CCP) – New People’s Army (NPA) sa rehiyon.
Gin-athag man sini nga ang mga parameters nga ginapatuman sa public safety and security sang tinalikdan nga eleksyon ang mahimo man nga ipatuman subong, apang nakasanto na sa parameter sang orange election hotspot nga ginpasaka sang Commission on Elections (COMELEC).
Gintuad man sang natungdan nga sa subong, wala pa sang nabalhag nga mga dalagko nga encounter sa tunga sang mga rebelde kag katapo sang gobyerno.
Ginalantaw man ni Lamzon nga may mga reclassification sa mga lugar sa rehiyon nga mahimo islan bangud man sa pagbuhin sang pwersa sang rebelde.
