Ginpanawagan ni 3rd District Board Member Mark Palabrica sa Sangguniang Panlalawigan sang Iloilo nga palig-onon ang fire protection services sa probinsya.
Suno kay Palabrica, 15 sa 93 ka firetruck sa Iloilo ang unserviceable, kag ang pila ka unit sini ang naga-serbisyo sang halos 30 na ka tuig.
Ini nga sitwasyon ang nagahatag sang peligro sa mga komunidad, ilabi na sa mga banwa nga isa lang ka firetruck ang ginasaligan.
Ginpunto man niya ang insidente sa banwa sang Bingawan, kun sa diin nagresponde lang ang personnel sang BFP sa isa ka sunog gamit ang fire extinguisher bangud unserviceable ang ila nga firetruck.
Bangud sini, gin-aprubahan sang Sangguniang Panlalawigan ang resolusyon nga nagapanawagan sa Department of the Interior and Local Government (DILG) kag BFP nga maghatag update sa requests para sa bag-o nga firetrucks kag maghimo sang province-wide inventory sang kagamitan.
Nagpahayag man si Palabrica nga kinahanglan ini nga hatagan sang nagakaigo nga solusyon agud masiguro ang safety sang mga pumuluyo sa tion sang emerhensya, labi na subong nga ginasaulog ang Fire Prevention Month.
