ILOILO CITY– Madamo sang ginlauman kag wala ginlauman nga topiko nagikan sa ikaapat nga State of the Nation Address ni Presidente Rodrigo Duterte si Iloilo 3rd District Congressman Lorenz ‘Nonoy’ Defensor.
Sa interview sang Bombo Radyo kay Defensor, iya ginpahayag nga ginalauman niya kuntani nga hatagan sang igtalupangod sang Presidente ang tuhoy sa kaso sang dengue sa pungsod partikukar na sa Iloilo nga may pinakamadamo nga kaso.
Suno kay Defensor ginaluaman man niya nga talakayon ni Duterte ang tuhoy sa build build build program sang gobyerno kag war on drugs apang wala ini natalakay.
Nangin malawig man suno kay Defensor ang pagtalakay sang Presidente sa isyu sang West Philippine Sea kag ang tuhoy sa Tax Reform for Attracting Better and Higher Quality Opportunities (TRABAHO) bill.
Pila sa makabig notable nga mga gintalakay sang Presidente suno kay Defensor amo ang posisyon ukon panindugan sang gobyerno sa isyu sang West Philippine Sea, pagbalik sang death penalty kag National Land Use Act.
Ginkalipay man niya nga gintalakay sang Presidente ang tuhoy sa ginpreparar niya nga hagna nga amo ang pagtukod sang Department of Water Resources.
Ginpahayag ni Defensor nga nakakita siya sang manami nga rason agud padayun nga iduso sa kongreso ang hagna agud matipon ang masobra 30 ka mga ahensya agud mahatagan kasulbaran ang problema sa kakulang sang tubig.
Nalipay si Defensor bangud naistoryahan ang pagkansela sang Barangay kag Sangguniang Kabataan elections sa masunod nga tuig kag ini ang ginsaylo sa Oktubre 2022.
Pinaagi sini suno kay Defensor mahatagan ligwa ang mga opisyales sang barangay nga mapatuman sang maayo ang ila tagsa ka mga programa.
