ILOILO CITY-Nagpabutyag sang pagpabor si Iloilo 3rd District Representative Lorenz Defensor Jr. sa paglegalize sang divorce sa Pilipinas.
Ini kasunod sang pag-apruba sang House Committee on Population and Family Relations sang House bills 100, 838 kag 2263 nga nagaduso sang absolute divorce ukon dissolution of marriage.
Sa interview sang Bombo Radyo kay Cong. Defensor, iya ginpahayag nga katuyuan sang hagna nga maprotektahan ang isa ka pamilya gikan sa paglala sang sitwasyon sa diin may presensya sang abusado ukon mapintas nga amay.
Suno kay Defensor, mas pakamaayuhon niya nga magbulagay ang mag-asawa nga yara na sa indi masalbar nga relasyon sa baylo nga magpabilin nga nagaupdanay apang magaantos man sa ila sitwasyon ang ila kabataan.
Gin-athag naman ni Defensor nga indi man mangin madali ang proseso sang divorce bangud kinahanglan nga lehitimo ang mga grounds nga iplastar sang partido nga naga-file sang divorce.
Pila sa mga grounds amo ang physical abuse,alcoholism,abandonment kag iban pa.
Nagapati naman ang opisyal nga sa tion nga iplastar sa plenaryo ang nasambit nga hagna, pat-od nga mapasar ini kag mangin isa ka layi bangud mayorya sa myembro sang House of Representatives ang pabor diri kag nahangpan ang kaayuhan nga dala sini sa isa ka pamilya.
