ILOILO – Pasakaan sang 4 counts nga kaso sang rape ang 38-anyos nga magulang nga naghimulos sa iya dalagita nga manghod sa Barotac, Viejo, Iloilo.
Matandaan nga ang biktima amo si alyas Nene, 16, samtang ang suspek naman amo ang iya nga magulang nga si alyas Nonoy, 38, soltero kag lunsay residente sang nasambit nga lugar .
Sa exclusive interview sang Bombo Radyo kay Police Staff Sergeant Lilibeth Marquez sang Women and Children Protection Desk, Barotac Viejo, Iloilo, iya ginpahayag nga apat ka beses ginhimuslan ni alyas Nonoy ang iya manghod.
Suno kay Marquez, una nga ginhimuslan ni alyas Nonoy ang dalagita nga manghod sang makaisa sang Oktubre 17 kag tatlo naman ka beses sang Nobyembre 27.
Pamatbatan man suno kay Marquez sang reclusion perpetua ukon pagkapreso tubtub nagabuhi ang suspek sa tion nga mapamatud-an nga nakasala.
Dugang pa sang natungdan, ipaidalum sa pila ka mga psychological interventions ang biktima bangud tubtob subong, indi man ini mahim-os bangud indi ini makapati nga mismo ang iya nga magulang ang nag-himulos saiya.
