ILOILO CITY – Ipatuman ang 4-day work week sa Iloilo City Hall umpisa sa Lunes, Marso 16, may kaangtanan sa kahangawa sa Coronavirus Disease 2019 (COVID-19).
Sa interview sang Bombo Radyo kay Iloilo City Mayor Jerry Treñas, iya ginpahayag nga iya pa nga istoryahon si Mr. Leo Elevencione ang Officer-in-Charge sang Human Resource Management Office, kun ano nga mga departamento ang dapat nga magsunod sa 4-day work week.
Suno kay Treñas, indi man mahinago nga may mga departamento nga indi dapat magsunod sa nasambit nga mandu bangud nga maapektuhan ang paghatag sang serbisyo sa mga may yara sang transaksyon sa Iloilo City Hall.
Katuyu-an sang nasambit nga lihok suno kay Treñas amo nga mabuhinan ang numero sang mga empleyado nga nagaduty sa Iloilo City Hall agud nga hatagan sang ligwa ang daily sanitation.
Magluwas sa One Entrance, One Exit Policy, ginpahayag ni Treñas nga siraduhon sa sulod sang duha ka semana ang Office for Senior Citizen Affairs kag ang Persons with Disability Affairs Office.
Sa pagpaathag sang alkalde, ang mga tigulang kag may mga sablag sa lawas ang madali nga malatnan sang balati-an rason nga temporaryo anay nga ipauntat ang trabaho sa nasambit nga mga opisina.
Sa baylo suno sa natungdan, ang duha ka mga opisina ang magaserbe anay nga registration area.
No ID, No Entry ang ipatuman kag kinahanglan nga magsulat sa logbook ang tanan nga may transaksyon sa Iloilo City Hall.
