ILOILO CITY- Gina-finalize na sang Iloilo City Government ang plano nga pagpatuman sang 4-day work week sa Iloilo City Hall.
Ini kasunod sang rekomendasyon sang National Economic and Development Authority (NEDA) nga pagpatuman sang 4-day work week sa atubang sang sunod-sunod nga pagtaas sang presyo sang petrolyo.
Sa interview sang Bombo Radyo kay Iloilo City Mayor Jerry Treñas, iya ginpahayag nga plano posible nga sa katapusan nga semana sang Marso ini ipatuman.
Suno kay Treñas, sa subong, may pila lang ka mga butang sila nga ginaareglo.
Pahayag sang alkalde, dako nga bulig ini para makakinot sa galastuhon ang mgs empleyado ilabi na ang may yara sang salakyan.
Gin-athag naman niya nga magapadayon sa gihapon sa regular nga operasyon ang pila ka opisina kaangay sang Iloilo City Health Office kag PSTMO.
Nahibaluan nga base sa rekomendasyon sang NEDA, 40 oras gihapon nga magatrabaho ang mga empleyado apang sa sulod na lang sang 4 ka adlaw ukon 10 ka oras kada adlaw.
Sang 1990s sang ginpatuman ang 4-day work week sa pungsod agud mabuhinan ang epekto sang energy crisis dala sang giyera sadto sa Iraq.
