Gin-anunsyo ni President Ferdinand “Bongbong” Marcos, Jr. ang pagpatuman sang four-day work week sa pila ka mga opisina sang executive department umpisa sa Lunes, Marso 9.
”Para naman sa bahagi ng pamahalaan: Simula sa Lunes, ika-9 ng Marso, pansamantala nating ipapatupad ang four-day work week sa ilang tanggapan ng ehekutibo,” kabahin sang video message sang presidente nga gin-release subong nga gab-i.
Ini nga tikang ang kasunod sang iya panawagan nga magkinot sa energy resources bangud sa gyera sa Middle East nga nag-apekto sa Pilipinas ilabi na sa presyo sang fuel products.
Suno sa presidente, wala nalakip sa four-day work week arrangement ang mga ahensya nga involved sa nagapanguna ukon emergency services.
Ginmanduan man ang mga ahensya nga magtipid kag magbuhin sang tubtob 20% sa konsumo sang kuryente kag petrolyo.
Temporaryo man nga ginadumilian ang mga biyahe kag mga aktibidad sang gobyerno nga indi kinahanglanon pareho sang study tour, team-building activities, kag mga meeting nga mahimo man himuon online.
SWELDUHANAY SA IDALOM SANG 4-DAY WORKWEEK ARRANGEMENT
Ginpaathag sang Department of Labor and Employment (DOLE) nga mangin intact sa gihapon ang sweldo kag benepisyo para sa mga trabahador pananglitan nga sundon sang kumpaniya ang proposed four-day workweek.
Isa ini ka flexible arrangement nga amo ang ginalantaw nga makabulig sa employees kag mga negosyo sa tunga sang pagtimbuok sang energy costs.
Suno kay DOLE Bureau of Working Conditions Director Alvin B. Curada, sa idalom sini nga arrangement, makumpleto sang employees ang standard 40-hour workweek sa apat ka adlaw sa baylo nga lima ka adlaw.
Sa pihak sini, wala sang ibuhin sa daily pay.
Sa sini nga compressed workweek setup, mas malawig nga oras ang trabaho sang empleyado kada adlaw agud nga malab-ot ang gina-require nga weekly hours.
Ang dugang nga oras sa sini nga schedule ang indi man makonsiderar nga overtime basta nga nakasulod ini sa nakasugtan nga 40-hour workweek.
