Gintawag sang isa ka research group nga hapaw ang mga solusyon nga ginatanyag sang gobyerno sa tunga sang ginalantaw pagtimbuok sang presyo sang produktong-petrolyo bangud sang epekto sang gyera sa Middle East.
Ini kasunod sang mga panugyan halin sa gobyerno nga magkinot sa gatong, indi magkadto sa indi importante nga mga destinasyon, pahat-pahaton lang ang price hike, magpangita sang mga gas station nga may discount, kag may naga-suhestyon man sang pagpatuman sang four-day workweek kag online classes.
Kagab-i, Marso 6, ginmandu naman ni President Ferdinand ‘Bongbong’ Marcos, Jr. four-day work week arrangement para sa mga ahensya nga yara sa idalom sang Executive Department umpisa sa Lunes, Marso 9. Paagi ini suno sa presidente agud nga ma-enforce ang energy conservation measures.
Sa interview naman sang Bombo Radyo kay IBON Foundation Executive Director Jose Enrique “Sonny” Africa, iya ginpahayag nga bisan ihambal pa sang Department of Energy (DOE) nga gradual ukon hagan-haganon lang ang price hike, indi sini makakas ang tuman kabug-at nga palas-anon para sa mga Pilipino.
Pahayag sini, ang tanan nga solusyon sang gobyerno wala naga-ako sang ila responsibilidad.
MGA REKOMENDASYON
Ginapanugyan naman sang research group ang pagkakas sang Value Added Tax (VAT) kag sang excise taxes sa fuel prices.
Suno kay Africa, kun kakason ini nga duha ka buwis sa oil prices, mapanubo ang presyo sang gasolina sang tubtub sa P16-17; mapanubo ang presyo sang diesel sang tubtub P13; kag mapanubo ang presyo sang kerosene sang tubtub P8.
Sa pihak nga bahin suno sa iya, kun magpadayon ang price hikes, ang gobyerno lamang ang maka-benepisyo bangud makaganar ini sang dugang nga P1.3 billion kada bulan sa VAT revenues halin lamang sa gasolina kag diesel.
Magluwas pa ini sa ginatos ka bilyones ka pesos nga nakuha na sang gobyerno halin sa VAT kag excise taxes sa existing oil prices.
Ginduso man sang IBON Foundation nga ihanda na ang subsidiya nga ihatag sa mga driver sang pampubliko nga salakyan agud nga barato gihapon ang pamasahe kag may kita gihapon ang mga driver. Magluwas diri suno sa iya, dapat nga may ayuda man para sa mga mangunguma kag mga manugpangisda.
Sa tunga sang ginalantaw nga pagsaka sang inflation, ginapanugyan man sini ang paghatag sang subsidiya sa mga pigado.
Una naman nga ginsiling sang DOE nga makabulig sa paghagan-hagan sang fuel prices ang ginaduso nga paghatag sang Kongreso kay Marcos sang temporaryo nga awtoridad agud nga kakason ang excise taxes sa petroleum products.#
