Ginreklamo sang pila ka mga pumuluyo sa syudad sang Iloilo ang pagsalangisag sa pagpatuman sang 4-day work week scheme sa Iloilo City Hall.
Pila ka mga residente ang nagruya lang sang nagpadulong sa Iloilo City Hall bangud wala nila nahibaluan nga sarado na ini kada adlaw sang Byernes.
Nahibaluan nga nagsugud na ang 4-day work scheme sa amo nga talatapan sang Marso 28.
Sa interview sang Bombo Radyo kay Iloilo City Mayor Jerry Treñas, iya ginpahayag nga gin-implementar ang amo nga work scheme agud nga maka-preserve sang energy kag makabulig pahagan-hagan sa gasto kag paggamit sang gatong bangud sa padayon nga pagsaka sa presyo sang produktong petrolyo.
Gin-athag man ni Treñas nga wala nalakip sa 4-day work week scheme ang mga opisina sang Public Safety and Tranportation Management Office (PSTMO), ang mga district health centers, City Engineer’s Office kag iban pa nga kinahanglan sa gihapon nga lima ka adlaw sa mga opisina agud nga maghatag sang essential services.
Yara man suno sa natungdan ang mga Punong Barangay nga amo ang responsable sa pagpahibalo sa ila mga residente sa bag-o nga office hours sang Iloilo City Hall.
