Nagbiyahe liwat padulong sa Vatican ang tatlo ka Filipino nga cardinal agud magtambong sa una nga extraordinary consistory nga ginpatawag ni Pope Leo XIV.
Ini amo sanday Manila Archbishop Cardinal Jose Advincula, Kalookan Bishop Cardinal Pablo Virgilio David, kag Cardinal Orlando Quevedo, archbishop emeritus sang Cotabato.
Maga-updanay man sila ni Cardinal Luis Antonio Tagle nga sa karon naka-base sa Roma bangod sa iya papel bilang pro-prefect sang Dicastery for Evangelization.
“Off for the extraordinary consistory of the College of Cardinals. Please include us in your prayers,” post ni Cardinal David sa social media.
Ang consistory amo ang pormal nga pagtililipon sang College of Cardinals nga ginapatawag sang Santo Papa agud diskusyunan ang husto kag matarong nga pagdumala sang Simbahan Katolika.
Sa press release sang Vatican, ginsiling nga ang consistory magalakip sang “moments of communion and fraternity” kag tyempo nga idedikar para sa “reflection, sharing and prayer.”
“These moments will be oriented towards fostering common discernment and offering support and advice to the Holy Father in the exercise of his high and demanding responsibility in the governance of the universal Church,” suno sa Vatican.
Magasugod ang consistory subong nga adlaw, Enero 7, kag magapadayon ini tubtob Enero 8.
