ILOILO CITY – Ginpasakaan na sang kaso ang 5 ka mga suspek nga nagbaldog sang kapin P40 million gikan sa isa ka balo sa Buenavista, Guimaras.
Sa interview sang Bombo Radyo Iloilo kay John Catipunan, special investigator sang National Bureau of Investigation (NBI)-6, napasaka na ang kaso nga syndicated estafa in relation to Cybercrime Prevention Act of 2002, batok sa duha ka Malaysian nga sanday Siti Faridah Binti Abdul Hamid kag Ishama Binti Sheck Dawood, duha ka Nigerian nga sanday Chukwudi Ugwu kag Francis Onyebuchi Amadi, kag isa ka Pinay nga si Rosalyn Ibarra.
Nagapakig-angot na ang NBI sa Malaysian Police agud mapadali ang kaso kag madesisyunan kun diin presuhon ang mga suspetsado.
Gina-usisa man ang record sang mga dumuluong kun legal ang ila nga pagkadto sa Pilipinas.
Nahibalu-an nga naglab-ot sa P38.8 million ang nakuha gikan sa biktima, sang prime suspect nga isa ka Malaysian nga iya lamang nakilala sa isa ka dating website.