Natalana nga buy-an sang Hamas ang apat ka iban pa nga mga bihag subong nga weekend kasunod sang nakasugtan sini nga ceasefire sa Israel.
Ang ginhingadlan nga papaulion amo ang apat ka mga babaye nga soldado nga taga-Israel nga amo sanday Liri Albag, 19; Karina Ariev, 20; Daniella Gilboa, 20; kag Naama Levy, 20.
Tanan sila ang gindala sa Gaza Strip bilang hostages sang Oct. 7, 2023. Ginkuha sila sang militante nga grupo halin sa Nahal Oz army base sa border sang Israel sa Gaza.
Ginkumpirma man sang opisina ni Israeli Prime Minister Benjamin Netanyahu nga nabaton nila ang lista sang pangalan sang female hostages nga hilwayon sang rebelde.
Kun mahatag na sila sang Hamas, ginalauman nga ibaylo sang Israel ang 200 ka Palestinian nga prisoners ukon detainees. Base ini sa kalkulasyon nga nakasaad sa agreement nga 50 detainees ang pagguwaon sang Israel sa kada isa ka babaye nga soldado nga buy-an sang militante nga grupo halin sa Palestine.
Kun matuman ini nga plano, pito na ang mahilway nga hostages lakip ang tatlo nga una na gin-release sang nagligad nga Domingo.
33 tanan ka hostages ang paguwaon halin sa Gaza Strip sa sulod sang una nga anum ka semana sang ceasefire sa giyera.
