ILOILO – Hugot ang pagbantay sa apat ka checkpoint areas agud nga indi makalab-ot sa probinsya sang Iloilo ang African Swine Fever.
Ini ang kasunod sang mandu ni Iloilo Gov. Arthur Defensor Jr. nga istriktuhan ang security measures sa tanan nga port lakip na ang Iloilo International Airport agud nga indi maglapta ang nasambit nga balati-an.
Sa interview sang Bombo Radyo kay Mayor Ronaldo “Onal” Golez sang Dumangas, Iloilo, iya ginpahayag nga lakip sa mga ginpahamtangan sang checkpoint amo ang New Lucena, Zarraga, Barotac Nuevo kag Dumangas.
Suno kay Golez, may yara man sang quarantine areas nga ginpahamtang sa probinsya sang Iloilo.
Ginpahayag ni Golez nga antes pa man nagpaguwa sang executive order si Gov. Defensor, iya na nga ginmandu ang istrikto nga security measures sa Dumangas Port agud nga indi makalusot ang kontaminado nga pork products.
Sa pagkamatuod suno sa natungdan, may apat na ka live animals nga ginpabalik sa ila point of origin bangud sa kakulang sang permit.
Ang mga produkto lang nga may yara sang kumpleto nga dukomento kag permit ang ginapahanugutan nga makalusot sa pantalan.
