Ginserbehan sang show cause order sang Land Transportation Office Region 6 ang apat ka mga driver nga nagpositibo sa surprise drug test nga ginpatigayon sang ahensya kag liwat nga nagpositibo sa confirmatory test sang Philippine Drug Enforcement Agency Region 6.
Sang nagligad nga semana, ginpatigayon sang duha ka mga ahensya ang “OPLAN: HARABAS” sa Ceres Terminal sa Barangay Camalig, Jaro kag Mohon Terminal sa distrito sang Arevalo sa syudad sang Iloilo.
Ang apat ka mga driver nga nagpositibo sa drug test ang ginalakipan sang taxi driver kag tricycle driver sa Ceres Terminal kag duha ka drivers sang mini bus sa Mohon Terminal.
Ginahatagan sang lima ka adlaw ang mga driver nga nagpositibo sa drug test nga magpaathag.
Samtang, ginkumpirma sang Association of Taxi Operators of Panay (ATOP) nga nag-resign na ang taxi driver nga nagpositibo sa iligal nga druga.
Ini kasunod sang ginpatigayun nga surprise drug testing sang Land Transportation Office (LTO) kag Philippine Drug Enforcement Agency (PDEA) sa Ceres terminal sa Jaro sang Abril 15, 2025.
Sa interview sang Bombo Radyo kay Mr. Perfecto Yap, Presidente sang ATOP, iya ginpahayag nga nakaalerto na ang industriya sang mga taxi agud nga mahatagan sang igtalupangon ang kapareho nga insidente.
Suno kay Yap, lakip sa tutokan sang talatapan amo ang mga nagasulod ukon naga-apply nga driver.
Gintuad man sini nga ang nagpositibo nga taxi driver ang gilayon nagpasa sang iya resignation kasunod sang nangin resulta sang drug testing.
Dugang niya nga wala na naglisensya ang driver sa operator sang taxi nga iya gina-ubrahan kag nagaguwa nga daw naglagyo lang ini.
Nagpasalig man ini nga sundon sang mga taxi operators nga ipaidalom sa random drug testing ang mga drivers agud masigurado nga nagasunod sila sa pagsulundan.
