ILOILO CITY- Apat ka mga drug groups nga naga-operate sa Western Visayas ang gina-monitor sang Philippine Drug Enforcement Agency (PDEA).
Sa interview sang Bombo Radyo kay Atty. Alex Tablate, regional director sang PDEA Region 6, iya ginpahayag nga ini nga mga grupo ang concentrated ang operasyon sa Negros Occidental.
Nagpamalibad naman si Tablate nga pangalanan ang nasambit nga mga grupo.
Sa pahayag naman ni Presidente Rodrigo Duterte nga may tatlo tubtob lima ka drug lords pa ini nga pangpapason antes magtakop ang iya termino sa Hunyo 30, ginpahayag ni Tablate nga wala pa man sila sang nabaton nga order angot diri.
May kaangtanan naman sa drug buybust operation nga ginpatigayon sang City Drug Enforcement Unit (CDEU) sa Purok Kapawa, Barangay Punta Taytay, Bacolod City kun sa diin masobra P1.1 million nga balor sang illegal nga druga ang nakumpiskar,wala pa maestablisar sang otoridad kun kabahin ini sang dako nga drug group.
Ang mga nadakpan nga nakuhaan sang 174 grams kag may estimated market value nga P1,183,200.00 amo sanday Pearl Je-Ann Elera, 26-anyos kag Riegel Troy Quimba, 20-anyos, lunsay mga high value individual kag mga residente sang nasambit nga lugar.
Sa interview sang Bombo Radyo kay PLtCol Arnel Solis, spokesperson sang Police Regional Office(PRO) 6, iya ginpahayag nga padayon pa ang ila pagpadalom sa imbestigasyon.
Sa subong, nakahunong ang mga arestado sa Bacolod Police Station 9 kag natalana nga pasakaan sang kaso nga paglapas sa R.A. 9165 ukon Comprehensive Dangerous Drugs Act of 2002.
