ILOILO – Ginalauman nga maga-umpisa na sa bulan sang Nobyembre ang pagtukod sang apat ka flyover sa syudad kag probinsya sang Iloilo.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga duha ka flyover ang pagatukuron sa syudad kag duha naman ang pagatukoron sa probinsya.
Suno kay Conlu, ang mga flyover ang pagatukuron sa Buhang sa distrito sang Jaro, Hibao-an sa distrito sang Mandurriao, Ungka kag Aganan sa banwa sang Pavia.
Ginpahayag ni Conlu nga ang mga flyover nga pagatukuron sa syudad ang prefabricated ukon himo sa steel samtang ang duha naman sa probinsya ang himu sa kontreto.
Kun prefabricated suno kay Conlu, madasig nga matapos bangud nga himu sa steel ang flyover apang konkreto sa gihapon ang pundasyon sini.
Ang apat ka lugar suno kay Conlu ang gintumod nga masako ilabi na kun rush hour.
Sa subong suno sa natungdan padayon ang paghimo sang plano para sa nasambit nga proyekto nga may katuyu-an nga mahagan-hagan ang traffic congestion.
