ILOILO CITY – Nagaserbe nga pamukaw kag inspirasyon para sa mga aspiring beauty queen ang pagkalakip sang apat ka Ilongga sa Bb. Pilipinas kag Miss Universe Philippines.
Sa Good Morning Philippines program, ginpahayag sang pageant enthusiast nga si Joeboy Agriam, nga sa subong nga tuig, apat ka Ilongga ang nagatinguha nga makakuha sang korona sa duha ka prestihiyoso nga pageant sa pungsod.
Sa bahin sang Bb. Pilipinas suno kay Agriam, sanday Karen Laurrie Mendoza kag Ana Thea Cenarosa ang magatiglawas sa Iloilo samtang sanday Rabiya Mateo ang Kim Chi Crizaldo naman sa labing una nga edisyon sang Miss Universe Philippines.
Kun sang una suno kay Agriam, talagsa lang sa malaka nga may Ilongga nga makasulod sa national pageant apang sa subong, ang apat ka beauty queen ang nalakip sa front runners sang kompetisyon.
Ang pageant journey sang apat ka beauty queen suno sa natungdan ang wala nangin mahapos bangud nga ang kada isa sa ila ang may yara sang ginasakripisyo para sa pageant.
Bangud sini, importante suno kay Agriam ang moral kag financial support nga ihatag sa apat ka mga kandidata nga nagatiglawas sa syudad kag probinsya sang Iloilo.
