ILOILO CITY – Natalana nga magpakuha sang swab sample para sa COVID-19 test ang apat ka manugbata nga iloy sa Brgy. Jereos, La Paz, Iloilo City.
Ini matapos nga naalangan kaina sang aga ang isa ka COVID-19 positive nga iloy kag nagbata na lang sa karsada antes nadala sa hospital.
Sa interview sang Bombo Radyo kay Brgy. Kagawad Mary Vasquez sang nasambit nga lugar, iya ginpahayag nga subong pa lang, ginpa-schedule na nga kuhaan sang swab sample ang apat ka mga iloy bangud nga kinahanglan ang negative RT-PCR test results sa ila nga pagbata sa hospital.
Suno kay Vasquez, isa man ini ka paagi agud nga mahibalu-an kun bala negatibo ukon positibo sa COVID-19 ang mga manugbata nga iloy kag agud nga malikawan nga maatrasar ang ila pagpadulong sa hospital kasubong sa natabo sa isa ka iloy nga COVID-19 positive.
Ginpahayag ni Vasquez nga bangud COVID-19 positive ang 33 anyos nga iloy nga nagbata kaina, ginhulat gid ang pag-abot sang Iloilo City Emergency Responders nga amo ang nagdala sa pasyente sa hospital.
