NUEVA VALENCVIA, GUIMARAS – Dakop ang apat ka mga manugpangisda bangud sa paggamit sang trawl sa Brgy. Unisan, Nueva Valencia, Guimaras.
Ang mga nadakpan ang ginkilala nga sanday Ernie Villavicencio, 34, Lorenzo Ibara, 35, Rene Boy Flores, 36, kag Manoy Dado,39, lunsay residente sang Cauayan, Negros Occidental.
Sa interview sang Bombo Radyo kay Police Master Sergeant Rey Galfo, imbestigador sang Nueva Valencia Municipal Police Station, iya ginpahayag nga gindakop ang apat ka mga manugpangisda bangud man sa indi lisensyado nga pagpangisda.
Suno kay Galfo, kapigaduhon ang isa sa mga rason kun nga-a napilitan ang apat ka mga manugpangisda nga magpasimpalad sa kalalawran sang Nueva Valencia.
Nakuha naman sa apat ang 15 kilos nga isda, unmark motorbanca kag fine net nga may duha ka dragging board.
Magapangatubang sang sampaw-sampaw nga kaso ang apat bangud sa paglapas sa municipal ordinance sa banwa sang Nueva Valencia.
