Tuman ang pagpasalamat sang apat ka manugpangisda nga lunsay taga-probinsya sang Iloilo matapos nakaluwas sa masobra lima ka oras nga pagpautaw-utaw sa kalalawran.
Kun matandaan, ginkumpirma sang Philippine Coast Guard-Iloilo Station ang impormasyon kaina sang kaagahon nga may yara sang sakayang pandagat nga na-utdan sang katig sa kalalawran sang Tigbauan kag Guimbal, Iloilo kagab-i, Enero 9.
Ang mga manugpangisda amo sanday: John Delos Santos, 56; Jomar Delos Santos, 26; Michael Nazareno, 23; kag Rey Calixto, 42.
Ang nasambit nga apat ka manugpangisda ang lunsay residente sang Barangay Cabanbanan, Oton, Iloilo.
Sa interview sang Bombo Radyo kay John Delos Santos nga amo ang tag-iya sang motorbanca, iya ginpahayag nga mabaskog ang balod amo man ang pagmadlos sang hangin rason nga nautod ang katig sang sakayang pandagat.
Gintinguhaan sang apat nga kay-uhon ang katig apang nahulog ang tatlo sa ila sa tubig kag si John lang ang nabilin sa sakayang pandagat.
Nakakas man ang ginasuksok nga life vest sang tatlo sa ila bangud wala nahigot sang maayo.
Bangud sang natabo, nagkapyot lang sa higot sang katig ang nasambit nga mga manugpangisda agud indi sila makabulag sa sakayang pandagat.
Suno kay Delos Santos, naka-text pa sila sa Bantay Dagat kag gin-coordinate sang Philippine Coast Guard-Iloilo ang pagrescue sa ila.
Nakit-an sila sa kalalawran nga may 14.8 kilometro ang kalayuon gikan sa Sinapsapan, Jordan, Guimaras kag natigayon nga ma-rescue sang passenger vessel nga Starlight Venus halin sa Batangas.
