ILOILO CITY – Apat ka Medical Technologists sang Western Visayas Medical Center Sub-National Laboratory ang nagpositibo sa Coronavirus Disease 2019 (COVID-19) as of August 11, 5:00 pm.
Suno sa Western Visayas Medical Center Sub-National Laboratory management, ang apat ka Medical Technologists ang yara na sa isolation facility para sa nagakaigo nga clinical management.
Temporaryo nga ipauntat ang operasyon sang out-patient laboratory bangud sa ginapatigayon nga total cleaning kag disinfection.
Ginapasiguro man sang tagdumalahan sang nasambit nga hospital nga padayunon ang pagproseso sang mga specimen nga nabaton humalin sang Agosto 10-11.
Ginalauman nga matapos sa gilayon ang pagpaninlo sa out-patient laboratory agud nga makabalik gilayon sa pagproseso sang specimen.
