Nakahunong na sa presuhan ang mag-ulutod nga lalaki kag isa ka abyan matapos ginatudlo nagpanggamo kag nagpalupok sang pusil sa Zone 3, Barangay Bo. Obrero, Lapuz, Iloilo City.
Ang mga suspek amo sanday Bryan Duran, Exequiel Duran, kag Bart Duran kag ang abyan nga si Rovinson Medianista nga boluntaryo man nga nagsungka sa pulis.
Sa amo nga shooting incident, duha ang pilason.
Ini amo sanday Silvestre Belleza, 37, nga nakaangkon sang igu sa dughan, kag isa ka 16-anyos nga menor de edad nga may igu naman sa abaga.
Sa interview sang Bombo Radyo kay Police Major Jose Val Ladublan, hepe sang Lapaz Police Station, iya ginpahayag ang una nga nagsita ukon nagsaway sa utod sang biktima amo si Medianista.
Ginapahayag nga may wala sang paghangpanay kag sunod na nga may naghaboy sang botelya sa compound sang mga biktima, kag nagguwa man ang mga biktima agud kumprontahon kun sin-o ang naghaboy sang botelya.
Sunod nga natabo ang bayluhanay sang botelya, tubtub nga may nabatian nga paglupok.
Ang ginatudlo nagpalupok sang pusil amo si Bryan.
Ginapahayag .45 caliber pistol ang gingamit apang wala man na-recover sang pulis.
Nakuha sa lugar ang duha ka unfired ammunition kag isa ka empty shell.
May mga witnesses suno kay Ladublan nga nagpamatuod nga si Bryan amo ang nagpalupok sang pusil, samtang ang iban naman nga upod sini ang naghaboy man sang botelya kag nagbulig sumbag. ##
