ILOILO CITY- May ginauyatan na nga Closed Circuit Television (CCTV) footage ang kapulisan sa natabo nga pagbuno kay NUPL- Visayas Asst. Vice President Atty. Angelo Karlo Guillen sa Gen. Luna Street, Iloilo City Proper.
Sa interview sang Bombo Radyo kay Police Major Mark Evan Salvo, hepe sang Police Station 1, iya ginpahayag nga base sa footage, nagsugataay ang biktima kag ang duha ka suspek apang ginsundan nila ini rason nga nagdalagan ang biktima kag ila ini nalab-ot, ginsapoti, ginbuno kag ginkuha ang iya sling bag.
Suno kay Salvo, may duha ka motor man nga nagdulog nga amo ang ginsakyan sang duha ka mga suspek sa pagpalagyo matapos ang insidente
Pahayag ni Salvo, ginalantaw nila nga robbery ang natabo kag makabig nga crime of opportunity.
Wala naman niya ginakonsiderar ang posibilidad nga naangot sa trabaho kag pag-redtag ang pagtuyo sa kabuhi ni Guillen.
Ginpandindugan niya nga prayoridad sang kalupisan ang protektahan ang kinamatarong kag kabuhi sang mga tawo kag indi ulubrahon sang mga pulis ang manghalit.
Samtang, posible nga ginbantayan na nga daan sang mga suspek ang abogado bag-o natabo ang pagpangbuno.
Sa interview sang Bombo Radyo kay Barangay Tanod Melchor Lomugdang sang Brgy. Villa Anita, Iloilo City Proper, iya ginpahayag nga antes ang insidente, may nakit-an na sila nga apat ka mga lalake sa lugar nga kaangay nga may ginabantayan.
Suno sa iya, wala man sila naglaom nga may malain nga tuyo ang amo nga mga tawo.
Pahayag niya, sang gab-i nga natabo ang insidente, nagaronda sila sa lugar.
Dugang niya, nakit-an pa nila nga nagadumugay ang biktima kag ang duha ka mga suspek kag sang nagapalapit na sila sang iya upod nga tanod, didto kag naghingagaw palagyo ang mga suspek sakay sa motorsiklo.
Sa baylo nga lagson ang mga suspek, mas ginpakamaayo nila nga magpangayo na lang sang bulig agud-i rescue ang nabun-an nga abogado.
