Nagpa-Bombo ang apat ka mga manogbulang matapos nga ginapahayag ginkastigo sang katapo sang pulis sa Sibalom, Antique.
Ang apat ka mga manogbulang ang lunsay taga-Iloilo kag nagpangayaw lamang sa Antique.
Sa interview sang Bombo Radyo kay Alin Diaz, nagpa-Bombo kag residente sang Rumbang, Pototan, iya ginpahayag nga tubtob subong, nagasuprer sila sa gihapon sang sakit kasunod sang pagpangkastigo.
Suno kay Diaz, gin-akusaran sila sang iya kaupdanan sang mga pulis nga nagapangbali sang tiil sang manok agud nga magdaog sa bulang.
Ginbuyagyag man sini nga anom ka mga pulis ang nagsaputi sa ila, kon sa diin, nag-angkon sila sang lagob sa guya, baba, lawas, kamot, kag lakip na ang ila alatrasan.
Indi man mabaton sang natungdan nga gintayaan sila sang 9mm nga armas-luthang kag ginpakaon man sang ila kaugalingon nga higko.
Gintuad man sini nga antes ang insidente, ginkuha sila sang salakyan kag ginpasakaan sang mga kaso kaangot sa ginabato sa ila nga alegasyon.
Nakapyansa naman si Diaz kasunod sang pagbayad sini sang bail.
Ginaalegar man ni Diaz nga ginkuha sang kapulisan ang ila mga kagamitan, lakip na ila bracelet, kulintas, kag mga kwarta nga indi magnubo sa P150,000.
Nahibaluan nga indi magnubo sa P100,000 ang dala sang tagsa isa sa ila kon sa diin, tanan ang ginkuha sang kapulisan.
Plano naman nila nga magpa-medical agud matumod kag mapamatud-an ang ila nga mga alegasyon.
Ginpahayag man sini nga wala sila nagreklamo sa Sibalom PNP bangud nagapati sila nga indi sila pag-i-cater sang kapulisan.
Ginpanginwala man sang mga nagpa-Bombo nga may involvement sila sa pagpamago ukon indi pagbayad.
Napalaab-ot naman sang mga natungdan ang ila nga reklamo sa National Police Commission ukon NAPOLCOM.
Bukas naman ang Bombo Radyo Iloilo sa pagpaathag sang Sibalom PNP.
