ILOILO CITY – Nagresulta sa areglohanay ang tuyo nga pagpanggamo sang isa ka pangayaw nga lalaki kaupod ang tatlo ka iban pa sa Brgy. Rizal Pala-Pala 2, Iloilo City apisar sang ginapatuman nga curfew hours bangud sa Coronavirus Disease 2019 (COVID-19).
Sa interview sang Bombo Radyo kay Punong Barangay Noel Soliman sang nasambit nga lugar, iya ginpahayag nga desidido siya kun tani nga ipapreso ang hubog nga lalaki nga nagtuyo nga magsulod sa ila barangay nga ginapaidalom sa quarantine.
Suno kay Soliman, ang lalaki nga ginkilala nga si Erwin Palma sang Brgy. Cochero sa distrito sang Molo kaupod ang tatlo ka iban pa ang ila nga ginsaway apang nagpamilit sa gihapon nga makasulod kag bangud sini, ila nga ginpaypayan ang nagapadulong nga Police Patrol Car.
Mismo ang pulis suno sa Punong Barangay ang nagduso nga aregluhon na lang ang kinagamo agud nga wala na sang problema.
Kun siya lang ang pamangkuton suno sa natungdan, iya gid nga ipapreso ang lalaki agud nga mangin leksyon para sa tanan nga wala nagasunod sa ginapatuman nga curfew hours.
Antes pa man sini, nauna na nga nakabaton sang report ang Bombo News Team nga may yara sang naga-inom sa higad sang dalan apisar sang curfew hours.
