CONCEPCION, ILOILO – Ginmandu na ni Concepcion, Iloilo Mayor Raul Banias ang pagdakop kag pagpatay sa tanan nga layaw nga ido sa nasambit nga banwa.
Ini matapos nga apat ka tawo ang ginkagat sang layaw nga ido nga nagpositibo sa rabies.
Sa interview sang Bombo Radyo kay Banias, iya ginpahayag nga kun magpositibo sa rabies ang pasyante, 100% ang fatality rate ukon wala na sang kahigayunan nga mabuhi pa.
Suno kay Banias, ang duha sa mga biktima ang naka-angkon sang gamay nga pilas sa tiil apang daku sa gihapon ang posibilidad nga mangin rabid person sa tion nga indi makapaidalom sa treatment.
Ginpahayag ni Banias nga ginpanugyan sang Provincial Veterinanrian nga si Dr. Daryl Tabuada nga mas maayo nga pamatyon na lang ang mga layaw nga ido agud nga indi na maglapta ang rabies.
Malain man suno sa natungdan nga pamatyon ang mga sapat apang nagakadapat nga pasulabihon kun ano ang makapaayo para sa kadam-an.
Sa subong, ginapanugyanan ang dog owners nga dapat tatapon sang maayo ang hinuptanan nga ido kag dapat nga pabakunahan ini bilang proteksyon sa rabies.
