ILOILO CITY – Nadakpan sa ginpatigayon nga buy-bust operation sang Regional Drug Enforcement Unit sa Barangay Katilingban, Molo, Iloilo City ang apat ka mga pamatan-on kalakip na ang duha ka menor-de-edad.
Nakuha sa mga ini ang 24 ka sachet sang shabu kag buy bust money.
Ang mga nadakpan amo sanday Adrian dela Cruz, 18; Raffy Bangal, 18; alyas Julio, 17; kag alyas Nene, 16.
Sa interview sang Bombo Radyo Iloilo, gin-ako ni Dela Cruz nga nagabaligya ini kag nagagamit sang iligal nga droga.
Ginakuha sini ang supply sang droga sa iya abyan.
Ginpanginwala naman ni alyas Nene nga may kaangtanan ini sa iligal nga droga.
Ginpahayag ni Nene sa Bombo Radyo nga nagpadulong lamang siya sa lugar para makaistoryahanay sila sang anay nobyo nga si Dela Cruz, bangud nga wala pa sang closure ang ila relasyon.