Apat ang patay kag 14 ang napilasan sa pagpang-atake sang armado nga mga suspek sa headquarters sang aerospace and defense company sang Turkey nga Turkish Aerospace Industries (TUSAS) nga malapit mismo sa kapital nga Ankara.
Si President Recep Tayyip Erdogan nga yara sa Russia agud makig-istorya kay Russian President Vladimir Putin amo ang nagkumpirma sa numero sang nagkalamatay sa amo nga “heinous terrorist attack”.
Sa 14 nga nasamaran, tatlo ang yara sa kritikal nga kondisyon.
Gindugang man sang interior minister sang pungsod nga ang duha ka suspek nga babaye kag lalaki ang lunsay napatay apang wala pa subong sang napaguwa nga dugang nga detalye kaangot sa ila nga identity.
Wala pa sang grupo nga nag-ako sang responsibilidad sa pagpang-atake.
Nahibaluan nga ini nga aerospace company ang na-incorporate sa Ministry of Industry and Technology sang Turkey sang 1973 para nga mabuhinan ang “foreign dependence” sang defense industry sang pungsod.
Isa ini sa pinakadaku nga defense companies sa Turkey kag naga-produce sang armed drones kag fighter jets. Ini man ang naghimo sa KAAN nga amo ang una nga national combat aircraft sang amo nga pungsod.
Base sa footages sa insidente, nagtimbuok ang maitom nga aso kag matunog man ang pagsigabong magluwas pa sa sunod-sunod nga lupok sang armas-luthang.
Miyembro ang Turkey sang gamhanan nga North Atlantic Treaty Organization ukon NATO kag napahibalo na ini subong kaangot sa amo nga atake. Nagapadayon pa ang imbestigasyon sang otoridad kaangot diri.#
