Apat ang patay kag siyam ang gindala sa ospital matapos nakaangkon sang injuries kasunod sang panibag-o nga shooting incident sa isa ka eskwelahan sa Estados Unidos sang Amerika.
Gin-report sang otoridad nga natabo ang insidente Miyerkules sang aga sa Apalachee High School sa Winder, Georgia kun sa diin base sa inisyal nga mga detalye, isa ka 14-anyos ang suspek apang indi pa maathag kun estudyante man siya sa amo nga buluthuan.
Suno sa Georgia Bureau of Investigation, buhi ang suspek kag subong yara na sa kustodiya sang kapulisan.
Antes ang pahayag nga may siyam nga gindala sa ospital, ginsiling sang law enforcement sources (base sa report sang CNN) nga yara sa 30 ka tawo ang nasamaran sa shooting kag indi maathag kun pila sa sini nga injuries ang tuga direkta sang gunshot wounds.
Nagpaguwa naman sang statement si US President Joe Biden matapos napahibalo sa amo nga insidente.
“Jill and I are mourning the deaths of those whose lives were cut short due to more senseless gun violence and thinking of all of the survivors whose lives are forever changed,” pahayag ni Biden sa press release.
“What should have been a joyous back-to-school season in Winder, Georgia, has now turned into another horrific reminder of how gun violence continues to tear our communities apart. Students across the country are learning how to duck and cover instead of how to read and write. We cannot continue to accept this as normal.”
Matapos ang krimen, gin-lockdown ang eskwelahan kag gin-assist ang mga estudyante nga makaguwa kag gindiretso sa designated safe zone.
Dinosena man nga mga pulis ang gin-deploy sa buluthuan kun sa diin ginabanta nga 1,900 ka estudyante ang naka-enrol.
Nagapadayon pa subong ang pagpangusisa sang Georgia Bureau of Investigation sa rason kag dugang nga background sang suspek.##
