Apat na ka mga person of interest ang ginasundan sang kapulisan kasunod sang kamatayon sang pito ka tuig nga bata nga babaye sa Brgy. Tampucao, Lambunao, Iloilo.
Matandaan nga nasapwan na lamang sang iya Lola ang bata nga si alias Bebe pasado alas dos kahapon sang hapon, Nobyembre 8.
Naglisensya lamang ang bata nga magkadto kuntani sa balay sang iya amay nga 20 tubtub 30 metros ang kalayuon halin sa balay sang iya Lola.
Sang amo nga tion, wala ang amay sa amo nga balay bangud nag-obra ini sa lain nga barangay sa banwa man sang Lambunao.
Sang nadugayan naman nga nakabalik ang bata, gin-check ini sang iya Lola, apang nakit-an na lamang ini nga nasulod sa sako sang feeds kag ginbutang ang sako sa CR sang balay. May higot sa liog sang bata, may mga agi sang kinarusan sa dughan, kag wala na sang pang-idalom nga panapton.
Nagapati ang pamilya nga ginhimuslan ang bata.
Sa interview naman sang Bombo Radyo kay Police Captain Jose Winston Biadog, hepe sang Lambunao Municipal Police Station, iya ginpahayag nga ipaidalom sa autopsy ang bangkay sang biktima.
Na-swab naman ang apat ka person of interest nga lunsay nagapuyo man sa amo man nga barangay.
Isa sa posibilidad nga ginalantaw sang mga pulis amo nga kilala sang biktima ang suspek nga may kahimuan sa krimen.
Padayon pa ang imbestigasyon sang kapulisan bangud sa subong, wala pa sang eye witness sa insidente kag lunsay circumstantial evidence pa lamang ang ginahawiran sang mga awtoridad.#
