ILOILO CITY – Ginmandu na ni Iloilo City Police Office (ICPO) OIC S/Supt. Henry Binas ang imbestigasyon batok sa apat ka mga pulis nga gintumod nga drug protector, sang nadakpan nga drug pusher.
Sa interview sang Bombo Radyo Iloilo, ginpahayag ni Chief Insp. Aldrin Lamera, ang mga pulis nga gintumod sang drug pusher nga si Gilbert Somodevilla amu sanday PO1 Domar Deocampo kag PO1 Degon nga karon preso man bangud sang kaangtanan sa iligal nga droga; PO2 Caro nga magaretiro na kag PO2 Mosu nga assigned sa Regional Drug Enforcement Unit (RDEU).
Matapos madakpan sa drug buy bust operation kagab-i, ginpahayag ni Somodevilla nga ang nasambit nga mga pulis ang protector sadto sang iya utod nga si Kenneth Somodevilla nga sa idalom sang Prevendido Drug Group, apang napatay matapos ginapahayag nagbato sa mga otoridad.
Suno kay Gilbert, masami nga nagapangayo sang protection money ang apat ka mga pulis, sa iya utod sang buhi pa ini.
Ginpahayag sa Bombo Radyo ni S/Insp. Sheilla Mae Sangrines, taghambal sang ICPO, indi pagkunsintihon sang ICPO chief ang nasambit nga mga pulis apang ginpasalig nga ipaidalom ang mga ini sa due process.