GUIMBAL, ILOILO – Nagapabilin nga asymptomatic ang 40 anyos nga manunudlo sang Guimbal National High School sa Guimbal, Iloilo matapos nagpositibo sa COVID-19.
Sa interview sang Bombo Radyo kay Darwin Haro, Principal sang Guimbal National High School, iya ginpahayag nga naka-work at home ang nasambit nga manunudlo kag wala na nakabalik sa eskwelahan.
Suno kay Haro, natukiban nga nagpositibo ang nasambit nga manunudlo paagi sa pooled testing samtang ang iban naman nga mga manunudlo ang nagnegatibo sa virus kag naka-quarantine na.
Kadungan sini, ginpasalig sang natungdan nga wala sang dapat kahangaw-an bangud nga indi man involved sa distribution sang modules ang nasambit nga manunudlo apang ginapahayag nga nakapadulong pa ini sa isa ka bangko sa ila banwa.
Sa subong, padayon ang contact tracing kag indi pa matumod kun paano nalatnan sang virus ang nasambit nga COVID-19 positive.
Bilang precautionary measure, nakapatigayon naman sang disinfection sa bug-os nga compound sang Guimbal National High School.
