Magapangayo sang bulig ang Bureau of Jail Management ang Penology (BJMP) Region VI sa Iloilo City Government kag iban pa nga local government units (LGUs) kun maglala pa ang sitwasyon sa BJMP-Ungka matapos nakarecord sang 40 ka panibag-o nga kaso sang COVID-19.
Ang mga infected ang ginalakipan sang 38 ka Persons Deprived of Liberty (PDL) kag duha ka BJMP personnel nga lunsay yara sa isolation facility sang presuhan kag nagapabilin nga asymptomatic.
Sa interview sang Bombo Radyo kay Jail Superintendent Gilbert Peremne, deputy regional director for administration sang BJMP Region VI, iya ginpahayag nga may nakahanda naman nga pasilidad para sa isolation apang sa subong, may mga resulta pa sang swab test nga wala nakaabot gani posible madugangan pa ang numero sang nagpositibo.
Nahibaluan nga 42 ka PDL kag walo ka personnel ang ginpaidalom sa test kag 10 pa ang wala sang resulta.
Suno kay Peremne, sila ang ginpaidalom sa swab test matapos isa ka 31 anyos nga preso halin sa Iloilo District Jail sa Pototan, Iloilo kag temporaryo nga nagtinir sa BJMP-Ungka ang napatay sang Setyembre 6 sa Western Visayas Medical Center kag natukiban sang Setyembre 10 nga positibo sa COVID-19.
Nakapasa naman sang request ang nasambit nga talatapan nga isuspinde anay ang pagtambong sang mga PDL sa court hearings samtang wala pa nakarecover ang mga infected sang virus.#
